تهران

تئرؤنِ مئن کی ایسأی تی دیل خونأ خأنه. خؤنه کی شونی اندی همه کس خو را بیته بوشوی و تأ جخترأدأی، خأنی وگردی. خؤنأم بوبوی می کلئی؛ اؤنه دئه مننئم، بی اون ایسه مننئم!

پ.ن. ای علامتِ جی مأ بدأنه: ˇ . مو کسره نئنم اونه جا. شومو گونین چی بنم؟

ناصر وحدتی گبؤن، فلکلؤرˇ موزیک أجی

آموزشگاه موسیقی «گلشن» سه شنبه روزؤن، ایته برنامه موسیقی درأ، که اونˇ مئن ایته قسمت موسیقی کلاسیکه و اویتأ بخش، ایرانی یا گیلکی موسیقی. ای سه شنبه، یأنی بيسˇ شيشؤمˇ آبان (تيرˇما ۱۲)، ناصر وحدتی بمأبو و در مورد گیلؤنˇ موسیقی فولکوریک گب بزأ و بحث بوکوده.  وحدتی خو گبؤنˇ مئن بؤته گه اتاقور مرکز اصلی موسیقی فولک شرق گیلانه و ایته زنأیˇ جی به اسم گل جهان نؤم ببرده گه اونˇ جی دویست و خورده ای ترانه بیشتؤسه بو و ضبط بوکوده بو. وحدتی معتقده موسیقی فولکˇ ریشه، ایته از بین بوشؤ تمدنˇ مئن دره گه اونˇ تمدن، به دلایل اقتصادی و سیاسی و جغرافیایی دئه وجود ندرأ اما اونˇ موسیقی هنوز زنده ایسه، هوتؤ گه تمدنˇ قرن ۱۸ و ۱۹ غرب از بین بوشؤ اما موسیقی کلاسیکˇ اون هنوز که هنوزه حرف اوله زنأ. وحدتی تعریف، موسیقی فولکˇ جی اینه که ای موسیقی برخاسته از مردم و قومˇ دیله و قابل چاکودن نیه، چون متعلق به گذشته یه، موسیقی فولکلور، داستانؤنˇ جی الهام گیتی و بر اساس او داستانؤن، یک نفر اونˇ سر ملودی نأیی یا هوتؤ خؤندی و سینه به سینه چرخسی. وحدتی  زنأکؤنˇ نقشه در شکل گیری گیلؤنˇ موسیقی فولکلور، خیلی مهم دؤنأ و معتقده رابطه بیجارکاری و زنان دلیل اصلی شکل گیری أمی موسیقی فولکلوریکه، هرجا که بیجار نأبو، موسیقی هم نأبو. گیلؤنˇ موسیقی فولکلور به عقیده وحدتی ایته ویژگی خیلی مهم درأ و اون اینه گه خیلی دیل نیشین و نوستالژیکه، هینه وسی غریبه ؤنم گه ایشتؤیده، خوش درده اونه. نکته جالب قضیه ای جلسه مئن ای بو گه کلˇ جلسه مئن، وحدتی گیلکی گب بزأ و آخرشم سه ته ترانه فولک بوخؤنده.

شئر و موزیک

شئر، زوانˇ مئن دگینه کی یکته نشانه‌شناسی نظامه. موزیک، زندگی خؤندشؤنˇ مئنأ جی خودشه أمره نشؤن دئنه.ای خؤندشؤن نی کی گاگلف سرصدا دخؤنده بنن، یک‌جور نشانه‌شناسی نظامˇ مئن درن. ماشینؤنˇ بوق و پؤلیسˇ فیشه و مردوم خنده و بورمه صدا و زأکؤنˇ ونگ و آهن و شیشه و جانورˇ خؤندش.
زوان یکته کؤللیته نومود کؤنه کی منطقی و باقایدهٰ و سربه‌تو دأنه؛ امما امی زندگی سرصدا نظام یکته کؤللیته نومود نکؤنه و سر به بیرین دأنه و ورأشین‌بأردهٰ.
هینˇ وأسی، شئر هأی خأنه زوانˇ نظامˇ جی بیرین بزنه و اونه ورأشین بأره و هأی داب بشکنه. موزیک امما خأنه سرصدا نظامˇ مئن یکته کؤللیت رچ بأره و هأی وگرده ای نظامˇ مئنه و اونه دچین‌واچین بکونه.
شئر، هارمونی‌ئه دشکنئنه و موزیک دشکسه موتیفؤنˇ جی هارمونی چأکؤنه.

هؤبی و افسانه بایگان

یک زمانی خالی Hobby بو کی شوکولاتؤنˇ مئن خارجی و خوشمزه بو و مأ یاد دره گرؤنم بو. هر وقت هؤبی هئم، کم-کمئی گاز زئم و نأم می دهنˇ مئن آؤأبی کی دیر تمنأبون. اینˇ مزه مینو شوکولاتؤنˇ همره فرق دأشت و اینˇ مئنم تیکه-تیکه فندوق دبو. یک جورایی او روزؤن افسانه بایگانه مؤنس!
امروز هنده هؤبی بخؤردم بدئم همچین خوشمزه‌م نیه. بخیاله اینˇ مئن نمک دره. مأ یاد بمأ او زمت، خوشی‌ئن خوشی نبؤن کی ای روزؤن اوشؤنˇ خاطره‌ٰنه خوشی همره یاد أبئنن. هؤبی و افسانه بایگان، سرکوب و سانسور و دَوَستن و آرزؤنˇ سقفه جیر أردنˇ جی أمی دهنه شیرینأگود.

چن سال بوگذشته تا یک نفر مأ خبر بدأ یکته تازه شوکولات بمأ اینˇ نؤم ایسه: «مترو»! گمؤن کؤنم «هدیه تئرانی‌»م هو روزؤن سینما مئن معروفأبؤبو.

ضرب‌الدر!

أفتؤه لگن هف دس، همه‌دنه کینه سولاخ!

III

یالانچی خنده بوده، مردوم نی؛ بوتم: تی یالانچی‌گری‌ئه بکون. بوته: یالانچی تؤی! بوتم: مو لافندˇ جؤر ایسأم. بوته: تو لافندˇ جی وأرگنئه ایسی!

II

می عممه خو کلˇانگوشتˇ واشکنˇ همره می کلله سوبوجؤنه کوشت و زواله پلت ولگؤنˇ خؤندشأ جی مأ گوت: تی ولگ آسمؤنˇ شی، تی بنه زمینˇ شی، تی ساینه مرگˇ شی‌ئه؛ آتشˇ خاکسترم تی روزی‌ئه.
می ساینه تلارˇ ناله دوارس دکت مازودارˇ توکه، بادˇ مئن خوشئه تؤ خورد.

دمأسسن

بعضی روزؤن آدمˇ دیل قورصه که خو را بیأته؛ باخی روزؤنم آدمه دیله سهن دکئنه کی نأ، ای را او را نیه؛ ای روزؤن خوجیر روزن. او روز که بفأمسی اصلن را بنا نیه بومؤنه و تو مننی را دکی و اصلن خأ پرأگیری، او روزؤنˇ جی مو ترسنم. او روزؤنه کی می چکره پرکنش گینه و می دیل کئنه می پا توک. هو روزؤن هی روزؤنه؛ نودؤنی را چیسه، چا چیسه؛ اصلن تو ملجه‌یی، کرکی، شالی، بیلی زأکی. هو روزؤنه که آدم خو زیندگی و توقایی و خو کار و خو همه چئه مئن، عینˇ خودی چیرکه بیجارخالˇ درون، دمأسسنه.

:)

اسمایل بزن اسمالئی. اسمایل بزن. بدار عکاس تی عکسه خوروم-خورومئی بکنه. سوک بئس اسمالئی اسمایل بزن. بدار عکسˇ مئن دکی. ویریسی. می خاشه والیسی. دخوسی. ای همه عکسˇ مئنˇ آدمؤنˇ مئن جخوسی. بشی دیوارˇ کش. تی دؤرئکه قاب بگیرن. بگیم: اینا! اینا! اسمالئکه. اسمایل‌-بزئه‌-اسمالئکه.

نادر زکی‌پور

مو سيا نيَم، شؤˇ شيره می جؤنگينه گيته
کيسه که تا بکشه روزˇ جی می جؤنِه پيته؟
ميثلˇ چنگر مو خأنم هرجا شيرين اؤ بدأرم
شورˇ اؤ دئه مأ بگنسه؛ خوبه بارؤن بوأره
مو شوروم‌را جی بومأم وؤشکئزأ می دیم خؤˇ جی
يه زیبيل تلخِˇ نَقَل می همره بأردم شؤˇ جی
خؤندگی ديل دره اؤرِه ژِگَله دَم نيزِنه
شادی، شبنم، أسأ تی مَچّه سر دئه نم نيزِنه!

توریسم

کارنوکوده کس اونی ایسسه کی شه نانوایی و نأنه کی وأسی کؤیتأ صفˇ مئن بئسه و أ حقیقتˇ أمرأ موواجه به کی خالی کارنوکوده نیه، تورم ایسسه.

اریستوکراسی

کم-کمئی «نؤخبه‌سالار» بؤدرم. بیخودˇ گب! خؤ مألومه کی خودم نؤخبه‌ٰنˇ جرگه مئن ایسأم.

ماری زوؤن̌ روز

ایمرو تهرؤن̌  مئن یته گیلک بیدئم؛ ذؤق بؤدم که شأنه اینه امره گیلکی گب زأن؛ فارسی اؤجا بدأی. ـ

خأ ماری زوؤنه کیشأیتن؛ خأ اینه گبأیتن. نخأ اینه فیریسأنئن؛ نخأ اینه چؤرأگودن. ـ